7ellblog

حل بلوغ؟ لا حل فمك خير

vendredi 14 janvier 2011 in Libellés : this is the sweet end

مبعد ما كنا نتنفسو بالباي أو الڨصبة، الحجب تنحي على الأنترنات الكل، و منطق "سكّر بلوغ نحل عشرة" ما عادش ياكل، توة مرحلة أخرى: أحرارنا و شهدائنا ما ماتوش باش يترفع الحجب على الأنترنات، أما باش يترفع الذل و القهر على المواطنين، توة عندنا فرصة باش نتكلمو، نعبرو، نحكيو، نعيطو: اليوم الشارع ولى متاعنا و كلمتنا فوق أي كلمة أخرى، و حتى رئيس الدولة اللي كنا خايفيين منو كي الغول إكتشفنا الناس الكل أنو مستعد يوخر و يطي تنازلات و يسمعنا، وهذا بالطبع موش مزيتو، هو "موظف" عندنا أحنا موش العكس
لذا يا معشر المدونين، نحبكم إتطالبو بحقوقكم كاملة: إحتلو الجرائد و المجلات، عبرو في التلافز و الراديوات، ما تخليوش الردائة تغلبكم و عبرو و كونو عند حسن ظن أي إنسان مات من أجل تونس، من أجل الجمهورية اللي في أقصى الحالات لازمها تستنى 2014 باش تاخو حقها، ما نكونوش متشائمين، ما نخليو حد يفكنا كلمتنا، ما نثمنو و ما نشكرو حد كيف يرجعلنا حقنا الأساسي و الشرعي في التعبير، توة هجوم على كل الجهات، موش هجوم مسلح أما هجوم أفكار و مواقف: توة إنجمو نبنيو تونس الغد، تونس متاع التوانسة موش متاع بن علي أو غيرو

تونسي؟ حل فمّك